Oqaaseqaatit nalinginnaasut
Inatsisartut 2001-imi ukiakkut ataatsimiinneranni Inatsisartut Inuussutissarsiorneq pillugu ataatsimiitsitaliaata "Takornariaqarnermik inuussutissarsiuteqarneq aamma nunami inuussutissarsiutit siuarsarneqarnissaat pillugit Inatsisartut inatsisissaattut siunnersuummut" isumaliutissiissummini Naalakkersuisunut kajumissaarutigaa, nunat allamiut umiarsuaasa takornarianik angallassissutit akileraarusiiffigineqarsinnaanerat misissoqqullugu; pineqartut tassaapput umiarsuit takornarianik angallassissutit Kalaallit Nunaata imartaani angalaartillutik umiarsualivimmut nunalittut imaluunniit Kalaallit Nunaanni umiarsualivimmut nunalinngikkaluarlutik umiarsualiviup avataani kisartut. Naalakkersuisuttaaq kajumissaarneqarput misissueqqullugit, umiarsuit takornarianik angallassissutit taamaattut Kalaallit Nunaata imartaani angalaartillutik ilisimasortaqartussaatitaanissaannik atuutilersitsinissamut suut periarfissaanersut. Misissuineq siunnersuummi matumani innersuussutigineqartoq Inatsisartut 2002-mi upernaakkut ataatsimiinnissaat sioqqullugu Inatsisartut Inuussutissarsiorneq pillugu ataatsimiitsitaliaanut nassiunneqareerpoq, taaguteqartoq "Umiarsuit takornarianik angallassissutit atorlugit Kalaallit Nunaanni takornarianik angallassineq pillugu nassuiaat, februar 2002".
Umiarsuit takornarianik angallassissutit umiarsualivimmiinnermut akileraarutinik akiliisarnissaat pillugu maleruagassanik allannguinissamik siunnersuutip saqqummiunneqartup kingunerissavaa, umiarsuarni takornarianik angallassissutini ilaasunit siusinnerusumit annertunerusumik nunatta aningaasaqarniarneranut akileeqataasarnerunissaat, soorluttaaq siunnersuutip kingunerissagaa Kalaallit Nunaata imartaani takornarianik angallassinermik neqerooruteqartut unammillersinnaanermut assigiinnerusumik periarfissinneqarnerat, tassami umiarsuit takornarianik angallassissutit nunamit suminngaanneernerat apeqqutaatinnagu tamarmik akileraarutinik akiliisussanngortussaammata.
Umiarsuit takornarianik angallassissutit Kalaallit Nunaata imartaaniittut pinngitsooratik ilisimasortaqartarnissaannik aalajangersagaliornissap piviusunngortinneqarsinnaanera misissuineq qulaani taaneqartoq malillugu periarfissaqanngilaq, ilisimasortassammi naammattut pissarsiarineqarsinnaanissaat ajornassammat. Aammattaaq umiarsuit takornarianik angallassissutit Kalaallit Nunaata imartaaniittut nalunaaruteqarnissamik nalinginnaasumik maannakkorpiaq pisussaaffilerneqarnissaat periarfissaqanngilaq, kisiannili ukiut amerlanngitsut qaangiuppata nalunaaruteqarnissamik nalinginnaasumik pisussaaffiliinissap nunat tamat akornanni aalajangiunneqarnissaa naatsorsuutigineqarpoq.
Siunnersuutaavoq umiarsuit takornarianik angallassissutit siunissami umiarsualivimmiinnermut akileraarutinik akiliisaratik, tassunga taarsiullugu umiarsuup ilaasuinut akileraarummik ilaasumut ataatsimut 300 kr.-inik akiliisarnissaat, kiisalu umiarsuup takornarianik angallassissutip naalagaa, umiarsuup Kalaallit Nunaanni umiarsualivimmut nunalinnissaa, umiarsualiviup avataanut kisarnissaa imaluunniit ilaasuminik sinerissami nunnigussinissaa nal.ak. 24-nik sioqqullugu allattorsimaffimmik ilaasut qassiunerinik imaqartumik Akileraartarnermi Pisortaqarfimmut nalunaaruteqartarnissaa.
Kiisalu allaffissorneq eqqarsaatigalugu siunnersuutigineqarpoq, umiarsuaatileqatigiiffiit ilaasunik angallassisut Kalaallit Nunaanni umiarsualiviit akornanni aalajangersimasumik ingerlaartut, aammalu Namminersornerullutik Oqartussanik sullissinissamik isumaqatigiissuteqartut, umiarsuarnut ilaasunik angallassissutinut taakkununnga umiarsualivimmiinnermut akileraarutinik akiliisussaatitaannginnissaat, tassa naatsorsuutigineqarmat sullissinissamik isumaqatigiissut naapertorlugu Namminersornerullutik Oqartussat akiliutissaat umiarsuaatileqatigiiffiup umiarsualivimmiinnermut akileraarutinut akiliisussaasuuguni akiligassaraluisut annertutigisumik appartinneqassasut.
Siunnersuutip ulloq 1. januar 2003-miit atuutilernissaa siunnersuutaavoq, umiarsuilli 2003-mi takornarianik angallassinissaat 2002-p aasaanerani tuniniarneqalereersussaammata inatsisip 2002-mi upernaakkut ataatsimiinnissami aalajangiutivinneqarnissaa pisariaqarpoq, 2003-mi angalanissat neqeroorutigineqarnissaat sioqqullugu angallassinissamik tuniniaasartut tamanna ilisimareerniassammassuk.
Umiarsualivimmiinnermut akileraarutit pillugit Namminersornerullutik Oqartussat nalunaarutaata nr. 28, 27. november 1997-imeersup matuma kingorna allanngortinneqarnissaa naatsorsuutigineqarpoq, tassa Kangerlussuarmi Narsarsuarmilu umiarsualivinnut nunalinnermi umiarsualivimmiinnermut akileraarutinik akiliisarnissaq aamma atuuttussanngorlugu.
Umiarsualivimmiinnermut akileraarutit pillugit Inatsisartut inatsisaata allanngortinneqarnissaanik siunnersuutip landskarsimut ukiumut 1,2 mio. kr.-ninik isertitsissutaanerusarnissaa naatsorsuutigineqarpoq, taakkualu saniatigut sipaarutaasussaapput Arctic Umiaq Line A/S-ip sullissinissamik isumaqatigiissutaatigut atunngitsuugassat ukiumut 1,8 mio. kr.-nit, tassalu katillugit ukiumut 3 mio. kr.-nit ukioq 2003 aallarnerfigalugu. Taakku saniatigut naatsorsuutigineqarpoq akileraarutip aaqqiivigineqarnissaanik siunnersuutip kingunerisaanik umiarsuit takornarianik angallassissutit amerlanerusut umiarsualivinnut nunalittalernissaat, tassuunakkullu umiarsuit takornarianik angallassissutit ilaasuisa nunamiinnerminni aningaasanik amerlanerusunik atuisalernissaat.
Siunnersuutip allaffissornermut malunnaatilimmik sunniuteqarnissaa ilimagineqanngilaq.
Siunnersuut Arctic Umiaq Line A/S-imut, Royal Arctic Line A/S-imut, Ineqarnermut, Attaveqarnermut Pilersuinermullu Pisortaqarfimmut, Avatangiisinut Pinngortitamullu Pisortaqarfimmut, Allattoqarfiup Inuussutissarsiutinut immikkoortortaqarfianut, Allattoqarfiup nunanut allanut tunngasunut allaffianut, Aningaasaqarnermut Pisortaqarfimmut, KANUKOKA-mut aamma Greenland Tourism A/S-imut tusarniaassutigineqarsimavoq, taakkulu oqaaseqaataat pisariaqarneri malillugit inatsisissatut siunnersuutip suliarineqarnerani ilanngunneqarsimapput.
Aalajangersakkanut ataasiakkaanut oqaaseqaatit
§ 1, nr. 1-imut
Umiarsuit takornarianik angallassissutit umiarsualivimmiinnermut akileraarutinik akiliissaarlutik, tassungali taarsiullugu umiarsuup ilaasuinut inummut ataatsimut akileraarummik akiliisalersussaammata, paatsoortoqannginnissaa pillugu siunnersuutigineqarpoq inatsisip taaguutaa allanngortillugu, Umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Inatsisartut inatsisaannik taaguuteqalernissaa.
§ 1, nr. 2-mut
Umiarsuit takornarianik angallassissutit pineqartut tassaapput umiarsuit ilaasartaatit aalajangersimasumik ingerlaartuunngitsut aammalu umiarsualivimmiit umiarsualivimmut ilaasunik assartuinissaq siunertarinerullugu ingerlaartuunngitsut. Ilaasuisa pingaarnertut siunertaat tassaasarpoq nuannaariarneq qasuersaarnissarlu, soorluttaaq umiarsuarmi takornarianik angallassissummi ilaasuulluni takornariatut angalasuunissaq imminermini pilerigineqartartuusoq.
Umiarsuaq ilaasartaat aalajangersimasumik ingerlaarunnaarallarluni takornarianik sinerissami angallassissalluni aallartippat, umiarsuaq takornarianik angallassisutut isigineqassaaq.
Ilaasut pineqartut tassaapput inuk kinaluunniit, akiliilluni akiliinaniluunniit umiarsuarmiittoq. Inuttat sullissisullu ilaasutut isigineqanngillat.
Siunnersuutaavoq umiarsuit takornarianik angallassissutit umiarsualivimmiinnermut akileraarutinik siunissami akiliisannginnissaat, apeqqutaatinnagu umiarsuaq umiarsualivinnut qassinut nunalinnersoq, tassungali taarsiullugu umiarsuup ilaasuminut ataatsimut akileraarummik 300 kr.-iniusumik akiliisalernissaa.
Ilaasumut ataatsimut akileraarut akiligassanngussaaq umiarsuaq Kalaallit Nunaanni umiarsualivimmut nunalippat, umiarsualiviup avataanut kisarpat imaluunniit ilaasuminik sinerissamut nunnigussippat.
Umiarsuaq Kalaallit Nunaata sineriaani angalanermini umiarsualivinnut arlaqartunut nunalippat imaluunniit ilaasuminik sinerissamut arlaleriarluni nunnigussippat tamanna akileraarutinik akileeqqinnermik nassataqartussaanngilaq. Umiarsuaq takornarianik angallassissut angallassinerminik aallartitsereerluni nutaanik ilaasoqalerpat, umiarsuaq ilaasumi nutaat amerlassusiat malillugu akileraarutinik akiliinerussaaq.
Takornarianik angallassineq Kalaallit Nunaanni umiarsualivimmiit aallartinneqarlunilu naammassineqarpat, umiarsuup Kalaallit Nunaanni umiarsualivimmit aallarnerani ilaasuisa amerlassusiat malillugu umiarsuaq akileraarutinik akiliissaaq. Umiarsuup Kalaallit Nunaata sineriaani angalaarnermini umiarsualiviit arlaqartut nunaliffigippagit imaluunniit ilaasuminik sinerissamut arlaleriarluni nunnigussippat tamanna akileraarutinik akiliinerunermik kinguneqassanngilaq. Umiarsuaq takornarianik angallassissut angallassinerminik aallartitsereerluni nutaanik ilaasoqalerpat, ilaasut nutaat amerlassusiat malillugu umiarsuaq akileraarutinik akiliinerussaaq.
Takornarianik angallassineq nunap allap umiarsualivianiit, matumani aamma danskit savalimmiulluunniit umiarsualivianniit aallartinneqarpat, Kalaallilli Nunaanni naammassineqarluni, tassanngaanniillu nutaanik ilaasoqarluni nunap allap umiarsualivianut, matumani aamma danskit savalimmiulluunniit umiarsualiviannut ingerlaassalluni takornarianik angallassineq nutaaq aallarnerpagu, taava umiarsuup ilaasut Kalaallit Nunaanni umiarsualivimmut ilaasorisaasa amerlassusiat kiisalu umiarsuup Kalaallit Nunaanni umiarsualivimmiit aallarnermini ilaasorisaasa amerlassusiat naapertorlugu umiarsuaq akileraarutinik akiliissaaq.
Umiarsuup Kalaallit Nunaanni umiarsualivimmut, umiarsualiviup avataani kisarsimaffissaminut sinerissamiluunniit ilaasuminik nunnigussiffissamisut tikitassaanut siullermut apuunnissaa nal.ak. 24-nik sioqqullugu umiarsuup takornarianik angallassissutip naalagaata allattorsimaffimmik, ilaasut qanoq amerlatiginerannik imaqartumik Akileraartarnermi Pisortaqarfimmut nassiussisarnissaa siunnersuutaavoq. Taamatut nalunaaruteqartussaaneq ullumikkut atuutereerpoq, tassami ingerlaarfissatut pilersaarut Akileraartarnermi Pisortaqarfimmut nalunaarutigineqareersimasoq naapertorlugu umiarsuup aalajangersimasumik ingerlaarfeqanngitsup naalagaa pisussaammat, umiarsuup Kalaallit Nunaanni akitsuuteqarfiusumut tikinnerani tikinneq umiarsualivimmi oqartussaasunut qaninnerpaanut piaarnerpaamik nalunaarutigissallugu, aammalu umiarsuup Kalaallit Nunaanni umiarsualivimmut tikiffissaatut naatsorsuutigineqartoq kingusinnerpaamik nal.ak. 24-nik sioqqullugu umiarsualivimmi oqartussaasunut pineqartunut nalunaarutigissallugu.
§ 1, nr. 3-mut
Sullissinissamik isumaqatigiissut tassaatinneqarpoq suliassanik aalajangersimasunik akimillu siumut isumaqatigiissutaareersumik Namminersornerullutik Oqartussat suliassanillu isumaginnittussap akornanni niueqatigiilluni isumaqatigiissut, isumaqatigiissullu taanna suliassanik isumaginnittussap, qanoq sulleritsiginini apeqqutaatillugu iluanaaruteqarfigisinnaavaa annaasaqaatigisinnaalluguluunniit.
Aalajangersagaq maannakkorpiaq taamaallaat Arctic Umiaq Line A/S-imut sunniuteqartussaavoq.
§ 1, nr. 4-mut
Siunnersuutaavoq umiarsuit takornarianik angallassissutit akileraarutinut akiligassaasa akiligassanngortarnissaat, umiarsuupumiarsualivimmut, umiarsualiviup avataani kisarfissaminut imaluunniit sinerissami ilaasuminik nunnigussiffissaminut siullermut tikinneraniit, aammalu kingusinnerpaamik aallalernerani akileraarutit Akileraartarnermi Pisortaqarfimmut akilerneqartarnissaat. Takornarianik angallassineq Kalaallit Nunaanni umiarsualivimmiit aallartinneqarpat akileraarutinut akiligassat umiarsuup umiarsualivimmut tassunga nunalinnerani akiligassanngussapput, akileraarutillu kingusinnerpaamik umiarsuup aallalernerani Akileraartarnermi Pisortaqarfimmut akilerneqassallutik. Takornarianik angallassineq aallartereersoq umiarsuaq takornarianik angallassissut ilaasunik nutaanik Kalaallit Nunaanni umiarsualivimmiit ilaasoqalerpat, akileraarutinut akiligassat umiarsuup umiarsualivimmut tassunga ilaasunik nutaanik ilaasoqalerfimminut nunalinneraniit akiligassanngussapput, akileraarutinullu akiligassat amerlissutaat taakku kingusinnerpaamik umiarsuup aallalernerani Akileraartarnermi Pisortaqarfimmut akilerneqassallutik.
Umiarsuarnut allanut umiarsualivimmiinnermut akileraarutinik akiliisussanut akileraarutinut akiligassat akilerneqarfissanngorfiat aammalu akileraarutinut akiligassat kingusinnerpaamik akilerneqarfissaat pillugit aalajangersakkat allannguuteqanngillat.
§ 2-mut
Inatsisartut inatsisaata ulloq 1. januar 2003-miit atuutilernissaa siunnersuutaavoq.
FM 2002/14
SDI j.nr. HAVN/25.01.01-7